Eleccions dau Parlament de Catalonha dau 21D: victòria dei independentistas!
Comunicat Oficiau - 22.12.2017
La Republica Federala Occitana saluda la victòria dei partits independentistas catalans ais eleccions dau Parlament dau 21 de decembre.
Una victòria importanta emb un taus de participacion recòrdi maugrat la propaganda mediatica e la pression policiera de l'estat espanhòu que manten en preson d'un biais arbitrari lo cap de l'Esquèrra Republicana de Catalonha (ERC) Oriol Junqueras e lei presidents d'Òmnium e de l'ANC (Jordi Cuixart e Jordi Sánchez).
La votz dau pòble catalan s'es exprimida en rendent la legitimitat au govèrn catalan caçat per la lei 155 de la Constitution espagnole, e en faguent comprendre que la majoritat silenciosa dei catalans èra pas unionista. L'RFÒC espèra qu'aqueu resultat permetarà la restauracion de la democracia e dau drech dau pòbla catalan de decidir de son avenir.
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : info@occitania-oc.com
Site : www.occitania-oc.com
Votacions en Catalonha: posicion de l'RFÒC
Comunicat Oficiau - 20.12.2017
Aquest 21 de decembre Catalonha vòta per causir un novèu parlament, en seguida de la dissolucion decidida per l'estat espanhòu en virtut de l'article 155 de la Constitucion.
Aquest vòt, impausat per Madrid, n'es pas mens important perque l'enjuec es doble:
- Mostrar que maugrat tot, lo pòble catalan e lei partits independentistas demòran estacats a la democracia e participaràn activament an aquesta votacion
- Esperar la legitimizacion dau referendum en temptar d'obtenir una victòria larga dei partits independentistas ò favorables au drech a l'autodeterminacion
La Republica Federala Occitana denóncia lei manòbras forbas de l'estat espanhòu que fa tot per perturbar la campanha dei partits independentistas en mantenent en preson lo president de l'ERC Oriol Junqueras, e lei presidents deis associacions ANC e Òmnium (lei dos Jòrdis) e en obligant lo president de la Generalitat, Carles Puigdemont, d'estaire en exil en Belgica.
Autra perfidia dau govèrn espanhòu: lo vòt es estat planificat en mitan de setmana (un dijòus e non pas un dimenge coma es de costuma) dins l'espèr de far montar l'abstencion au profiech dei 4 listas electoralas unionistas. De mai, leis carrieras e lei corredors dau mètro de Barcelona son cobèrts d'afichas dei partits pro-Madrid (Partit Popular e Ciutadanos) dementre que la color jauna es interdicha perque fa allusion a la defensa dei presoniers politics. Es una manipulacion mentala digna d'un regim autoritari.
L'RFÒC garda pasmens l'espèr e sa fisança en la capacitat dau pòble catalan de se mobilizar e d'impausar sa votz e sa volontat de decidir de son pròpri avenir.
Visca Catalunya! Visca la llibertat i la democracia ! (en catalan)
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : info@occitania-oc.com
Site : www.occitania-oc.com
Region "Occitanie": l'"ADN" d'una vergonha!
Comunicat Oficiau - 07.12.2017
Es amb granda pena e pietat qu'avèm constatat la creacion d'un novèl imne per la region dicha "Occitanie", interpretat per lo promier còp a Narbona lo 30 de novembre passat a l'escasença d'un rescòntre de rugbí.
Non contenta d'aver usurpat lo nom "Occitanie" e de l'aver confiscat ai país occitans fòra Lengadòc, la region de Tolosa-Montpelhièr es anada encara mai luenh dins l'abominacion en se dotant d'un imne au títol particularament afrós: "L'ADN Occitan". Coma se l'occitanitat dau pòble foguèsse una question de genetica.
E pièger, sei autors, autoproclamats "trobadors dei temps modèrnes" sens paur dau ridicul, an causit d'escriure lei paraulas exclusivament en francés "per qu'aqueste cant siágue un imne dobèrt a totei e tornat devèrs l'avenir".
Avèm aquí lo resumit perfiech de la natura de la nòva region dicha "Occitanie": una estructura tecnocratica francesa, centralizada a Tolosa e amb una vision tipicament jacobina de l'identitat occitana reducha au terraire, a l'istòria e au passat. Per ela, l'avenir es lo francés, v'avèm ben comprés: "Se canta lei racinas d'Òc en lenga d'Òil"...
La Republica Federala Occitana a totjorn denonciat aquela mascarada promouguda per certans militants occitanistas qu'an pas esitat de traïr seis ideaus per oportunisme politic e per fin de veire lo nom "Occitanie" figurar sus lei mapas, quiti d'exclurre leis autrei país occitans sens consideracion, e mai de pactizar amb lei secessionistas lingüistics antioccitans de Provença que i an vist una oportunitat qu'èra pas d'esperar per legitimar enfin sa vision erronèa de la "pluralitat dei lengas d'Òc".
Ara la Republica Federala Occitana es la soleta entitat que pretend representar administrativament tota l'Occitània granda, aquela que va de Mentan a Bordèu, de Lemosin ai Pirenèus, e que lo solet imne legitim es lo "Se Canta", cantat exclusivament en occitan.
Au contrari d'una estructura jacobina, centralizada e tornada devèrs París, l'RFÒC propaua la construccion d'un Estat federau que favoriza lo mai la gestion locala. Dins aquesta logica s'es fondada en 2010 la República de Nissa, promiera republica federada, que va inaugurar aqueste mes sa promiera moneda locala "lo Nissart".
Dins la dralha d'una construccion d'Occitània granda tròç per tròç, encoratjam la creacion d'autrei republicas occitanas localas.
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : info@occitania-oc.com
Site : www.occitania-oc.com
La Republica Federala Occitana condemna la repression estatala espanhòla
Comunicat Oficiau 02.11.2017
Lo dijòus 2 de novembre de 2017, en plen còr d'Euròpa, la justícia d'un país membre de l'Union Europèa (Espanha) a ordenat l'incarceracion de 9 membres dau Govèrn Catalan, elegits democraticament per lo pòble catalan.
La Republica Federala Occitana (RFÒC) condemna vigorosament l'estat espanhòu per aquel acte que jutja particularament indigne d'una democracia e que constituís un atac grèva còntra lei libertats lei mai elementàrias.
Per remembrança, es pas lo primier còup que l'estat espanhòu comet una violacion de la libertat d'opinion: lo 16 d'octòbre passat, lei dos presidents d'associacions independentistas Jordi Cuixart (Omnium Cultural) e Jordi Sanchez (ANC) èran plaçats en detencion preventiva per delicte d'opinion. Çò que pòrta a 11 lo nombre de presoniers politics catalans en Espanha.
L'RFÒC exigís per consequéncia la liberacion immediata dei membres dau Govèrn Catalan e dei dos Jordi, e demanda a l'Union Europèa qu'intervengue per denonciar e n'acabar emb aquest viratge autoritari adoptat per lo govèrn de Rajoy.
La Republica Federala Occitana es solidària dau Govèrn Catalan que vòu bastir la República catalana, democraticament vouguda per la nacion catalana.
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : info@occitania-oc.com
Site : www.occitania-oc.com
La Republica Federala Occitana reconeis la Republica Catalana
Comunicat Oficiau - 28.10.2017
La Republica Federala Occitana reconeis la República Catalana.
La República de Nissa (federada a la Republica Federala Occitana) espèra que la Val d'Aran (territòri occitan dins la República Catalana) devengue tanben un república federada a la Republica Federala Occitana.
Uèi, lo 27 d'octòbre de 2017, lo Parlament Catalan a votat e proclamat l'independéncia de Catalonha sota forma de República, en conformitat amb la volontat dau pòble catalan que s'èra exprimit per una esquichanta majoritat (90%) en favor de l'independéncia mentre lo referendum dau 1r d'octòbre, menat democraticament e regularament maugrat la repression policiera de l'estat espanhòu.
La Republica Federala Occitana pren acte d'aquesta proclamacion istorica, tant per Catalonha que per Occitània e Euròpa tota, e reconeis solemnament l'independéncia de Catalonha.
De ligaments frairaus e solidaris an totjorn existit entre Catalonha e Occitània. Per remembrança, en Val d'Aran, pichin territòri occitanofòn de la Generalitat de Catalonha, l'occitan aranés a obtengut en lo 1990 l'estatut de lenga oficiala (cas unic dins Occitània tota), estendut a tota la comunautat autonòma en lo 2006 puèi renforçat per una lei catalana en lo 2010.
Visca Catalunya ! Viva Occitània !
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : info@occitania-oc.com
Site : www.occitania-oc.com
La Republica Federala Occitana sosten lo pòble e lo Govèrn catalans dins sa lucha per l'independéncia !
Comunicat Oficiau - 20.09.2017
La Republica Federala Occitana (RFÒC) pòrta tot son sosten a Catalonha dins sa lucha per son independéncia !
Actualament, l'Estat espanhòu es a menar una politica repressiva per fin d'empedir lo referendum sus l'independéncia de Catalonha que deu se debanar lo 1r d'octòbre de 2017.
L'RFÒC condemna emb vigor lei pressions e intimidacions deis autoritats espanhòlas còntra Catalonha, e denóncia la deriva autoritària dau govèrn madrilenc, a cu demanda exprèssament de respectar lo drech dau pòble catalan de decidir de son avenir, en faguent remembrar que l'autodeterminacion es un principi fondamental reconegut per lo Drech Internacionau.
La Republica Federala Occitana entreten despuei totjorn de ligams diplomatics e culturaus fòrts emb Catalonha e còmpta dins son govèrn un ministre catalan (Xavier BADA, ministre de la justícia) e una ambassadritz d'Occitània en Catalonha (Assompció AMAT).
De mai, Occitània es fòrça concernida per la situacion de Catalonha vist que lo territòri d'aquela conten una entitat occitana: lo Vau d'Aran.
Viva Catalunya ! Viva Occitània !
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : rfoccitana@gmail.com
Site : www.occitania-oc.com
La Republica Federala Occitana celebrarà la Fèsta Nacionala Occitana a Levenç (República de Nissa)
Comunicat Oficiau - 14.06.2017
La Republica Federala Occitana celebrarà lo dissabta 17 de junh a 11 oras la Fèsta Nacionala Occitana
La celebracion de la Fèsta Nacionala Occitana començarà per un acamp davant la pèira dau Botaa au 7 de la plaça de la Libertat a Levenç, en l'onor de la nacion occitana que s'espandís de Nissa a Bordèu e de Lemosin ai Pireneus. La República de Nissa se jonharà tanben a-n-aquesta manifestacion nacionala.
Es lo Val d'Aran (enclaus occitan de 10 000 estatjants que se tròba en Catalonha) qu'a instaurat aquesta fèsta nacionala, per fin d'onorar l'establiment en lo 1990 de son govèrn mièg-autonòm, que la lenga occitana es co-oficiala, estatut unic en Occitània tota.
Catalonha a atribuit a l'occitan un estatut de lenga co-oficiala en Val d'Aran, la situacion de l'occitan en França es de mai en mai perilhosa mentre que la pression estatala francea es totjorn tant fòrta : abséncia d'estatut oficiau, sota-representacion en la vida publica, marridas volontats persistentas que penalizan son ensenhament.
Tot aquò pòu pas mai durar ! N'i a pron d'èstre mespresats !
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : rfoccitana@gmail.com
Site : www.occitania-oc.com
Vots oficiaus dau president de la Republica Federala Occitana per l'An Nòu 2017
Comunicat Oficiau - 01.01.2017
Caras ciutadanas, cars ciutadans,
L'Annada 2016 que s'acaba foguèt plena d'eveniments divèrs, e malurosament, d'eveniments tragics e de fachs inquietants.
A-n-aqueste títol podèm pas s'empedir de pensar a l'òrre atemptat qu'a sanguinolat Nissa lo 14 de julhet passat, faguent 86 mòrts e mai de 400 ferrits.
Podèm pas s'empedir de pensar a l'atemptat similar qu'a recentament ensanguinolat Berlin, capitala d'un país qu'es estat mantei còps murtrit per lo terrorisme aquest an.
Lo terrorisme sevís pertot, pica totei lei país, totei lei continents. Es alimentat per lei guèrras, lei chaples de civils, lei injustícias que ne'n resultan. Que siágue en Siria, en Libia o en Republica Democratica dau Còngo, terrens de lucha entre potenças regionalas e estrangieras que d'unei viran a de dictaturas menaçantas, e dins lo fra temps victimas de dictators fòls lèsts de sacrificar de desenas de miliers de vidas umanas per mantenir sei poders.
L'Annada 2016 èra tanben aquela de l'inquietanta montada dau populisme extremista dins lei societats occidentalas, illustrada per lei darrieras resultas electoralas Outra-Atlantic, caracterizadas per la victòria deis ideas retrogradas talas que lo racisme decomplexat, la misoginia, l'omofobia, l'exclusion sociala, lo climato-scepticisme, lo gost de l'autoritarisme, eca. Aqueleis indicacions son pauc rassegurantas per lei futuras votacions que se debanaràn dins lei país de l'Union Europèa en 2017.
Pasmens, devèm contunhar de creire en l'espèr d'un avenir melhor e agir en aqueste sens.
L'annada passada nos a fach prendre consciéncia de la necessitat de propausar, fàcia a l'opression dau nacionalisme expansionista francés vector d'extremisme, una alternativa societala occitana democratica, progressista e pròcha dei preocupacions popularas.
Fàcia au desvolopament dei problemas evocats çai-sus, devèm preconizar, en plaça dau nacionalisme d'exclusion e de replec sus se, la solidaritat entre totei lei pòbles en lucha contra leis imperialismes politics, culturaus e economics.
La Republica Federala Occitana a totjorn agit dins aquesta logica de dobertura sus l'internacionau amb una ret d'ambassadas permetent de relacions emb divèrs país. Ansin, en 2016, la RFÒC a dobèrt una novèla ambassada d'Occitània en Lituania. Lei representacions a l'internacionau van aumentar en 2017.
La Republica Federala Occitana agís tanben a l'escala locala despuèi totjorn, amb la República de Nissa que i es federada, e qu'es a metre en plaça la moneda locala "lo nissart" que sarà efectiva en 2017.
Un molon d'autrei projèctes per l'establiment de republicas localas saràn mes en òbra per la novèla annada.
Vos auguri a totei una excellenta Annada 2017, que vòli Annada de l'espèr, de la lucha e de la solidaritat !
Bòna e Urosa Annada 2017 !
Ciril JOANIN
President de la Republica Federala Occitana
***
Prètz, Larguesa e Paratge
***
REPUBLICA FEDERALA OCCITANA
Provença, OC – 84120 PERTUS
Tel.: +33 (0)6 46 62 74 93
E-mail : rfoccitana@gmail.com
Site : www.occitania-oc.com
